Пятнаццатага красавіка 2024 года ў рамках навуковай канферэнцыі студэнтаў і магістрантаў “Тыдзень навукі-2024” на кафедры лінгвістычных дысцыплін і міжкультурных камунікацый эканамічнага факультэта Брэсцкага дзяржаўнага тэхнічнага ўніверсітэта працавала секцыя (падсекцыя І) “Эстэтычны і выхаваўчы патэнцыял беларускай культуры і літаратуры” (старшыня – кандыдат філалагічных навук, дацэнт Яраслаў Рыгоравіч Самуйлік, сакратар – старшы выкладчык Ларыса Мікалаеўна Грыцук).

Усяго на канферэнцыі было прачытана 12 дакладаў, у якіх асвятляліся наступныя тэмы:

• асветнікі Беларусі (Казбяровіч Арцемій “Кірыла Тураўскі – славуты сын зямлі беларускай”, Сідарук Ганна “Нябесная заступніца зямлі беларускай Ефрасіння Полацкая”, Гецман Рэнат “Францыск Скарына – першадрукар, асветнік, гуманіст”);
• дзеячы беларуска-польскага фальклорна-літаратурнага пагранічча ХІХ стагоддзя (Якушэвіч Ганна “Ян Чачот – паэт-рамантык, філамат, фалькларыст”);
• заснавальнікі новай беларускай літаратуры і новай беларускай літаратурнай мовы (Хінец Ганна “Не пакідайце мовы нашай беларускай, каб не ўмёрлі!”: жыццёвымі і творчымі сцежкамі Францішка Багушэвіча”, Разуванава Анастасія “Роля Вінцэнта Дуніна-Марцінкевіча ў станаўленні нацыянальнай культуры”);
• жыццё і творчасць беларускіх пісьменнікаў (Шульгіна Валерыя “Пачынаецца ўсё з любві...”: жыццёвы і творчы шлях Яўгеніі Янішчыц”, Кулік Андрэй, Шляжка Алег “Сяргей Грахоўскі: вядомы і невядомы”, Конан Аліна “Тэма кахання ў паэзіі Яўгеніі Янішчыц”, Давыдоўская Соф’я “Тэма прыроды ў лірыцы Яўгеніі Янішчыц”);
• спецыяльная лексіка (Галдзюк Дар’я “З гісторыі беларускай навуковай тэрміналогіі”);
• дзяржаўныя і ваенныя дзеячы эпохі Вялікага Княства Літоўскага (Смаль Аляксей “Мікалай Радзівіл Чорны – дзяржаўны дзеяч і мецэнат”).

У цэлым, праца секцыі прайшла на высокім навукова-тэарэтычным і метадычным узроўні.