У Брэсцкім дзяржаўным тэхнічным універсітэце адбылася перадача абсталявання для вучэбнай лабараторыі па спецыяльнасці «Мытная справа». Прадастаўленае Брэсцкай мытняй абсталяванне ўжо актыўна выкарыстоўвалася на практыцы і цяпер стала часткай навучальнага працэсу.

У цырымоніі перадачы прынялі ўдзел намеснік начальніка Брэсцкай мытні Віктар Пятровіч Верамеюк, дэкан эканамічнага факультэта БрДТУ Вікторыя Васільеўна Зазерская, загадчык кафедры бухгалтарскага ўліку, аналізу і аўдыту Наталля Васільеўна Патапава, супрацоўнікі мытні, выкладчыкі універсітэта і студэнты спецыяльнасці «Мытная справа».

Віктар Пятровіч звярнуўся да прысутных з прывітальнай прамовай, падкрэсліўшы важнасць стварэння сумесных навучальных лабараторый для падрыхтоўкі высокакваліфікаваных спецыялістаў, якія змогуць эфектыўна працаваць у сферы мытнага кантролю.

Супрацоўнікі Брэсцкай мытні падрабязна распавялі і прадэманстравалі працу перададзенага абсталявання. Цяпер студэнты маюць унікальную магчымасць не толькі бачыць тэхнічныя сродкі ў інфармацыйных фільмах і навучальных выданнях, але і выкарыстоўваць іх у рэальных практычных занятках.

Дэкан эканамічнага факультэта Вікторыя Васільеўна Зазерская выказала шчырую падзяку Брэсцкай мытні за актыўны ўдзел і падтрымку ў аснашчэнні новай лабараторыі. У сваім выступленні яна пажадала выкладчыкам і студэнтам поспехаў і годных вынікаў у іх прафесійнай падрыхтоўцы.